Jarrai - Haika - Segi

Esparru ezberdinetako hainbat kidek zilegitasuna aitortu diote SEGIri

25 urte baino gehiago daramatza Gazte Erakunde Iraultzaileak independentzia eta sozialismoaren aldeko borrokan. Bide horretan, milaka lagun izan dira antolatzen eta borrokatzen aritu direnak. Orain, urtarrilean, ebaztekoa da Jarrai-Haika-Segiren kontrako epaia. Auzitegi Gorenak "ilegaltzat" edo "terroristatzat" jo dezake Segi, honen harira, 24 inputaturen eta azken finean euskal gazteria osoaren kontrako epaia izan daiteke.

Segiren alde eta sasi-epaiketen kontra hainbat izan dira atxikimendua eskeinitako musikari, kirolari, bertsolari eta eragileak. Euskal Gazteria Aurrera izendatutako manifestua irakurri zuen Kloratita musika taldeko kantanteak bertaratutako guztien izenean. Hauen esanetan, "euskal gazteriak betidanik izan du Euskal Herriak bizi duen gatazka politikoa gainditzeko nahia", nahiz eta, "argi zegoen gazte indarrarekin amaitu nahi zela eta norabide horretan ilegalizazioak eta gazte erakundeetako kideen atxiloketak eman ziren". Aste gutxi barru kaleratuko den epaiaren inguruan ere mintzo izan ziren lagunak. Ilegalizazio ororen kontra agertu ziren, gainera, sinatzaileek, edozein kolektiboren eskubidea bere helburu politikoak lortze bidean "antolatzea eta borrokatzea" dela gehitu zuten; ondorioz, Euskal Herriko musikari, kirolari, eragile... andanak "Segi Gazte Erakundearen jarduera soziopolitikoa zilegiztatzen dugu".

Euskal Herriko selekzioak

"Konpromisorik gabe, babesik ez!"

.

.

Euskal Selekzioaren aldeko manifestua:

.

1. Gaur egun, gure herriari, Euskal Herriari, ez zaio aitortzen selekzio propioa izateko duen eskubide kolektiboa. Horren ondorioz, euskal kirolariok nazioarteko txapelketa ofizialetan ezin dugu parte hartu euskal selekzioarekin. Eta, gainera, diziplina federatiboa dela eta, derrigortuta gaude txapelketa horietan gure herriak bereak sentitzen ez dituen koloreekin egitera, hau da, Espainia eta Frantzia ordezkatzera.

.
2. Gu euskal kirolariak garenez, euskal nazioaren koloreekin eta gure ereserkiaren doinupean lehiatu nahi dugula aitortzen dugu. Beraz, Euskal Selekzioak nazioartean eta txapelketa ofizialetan parte hartzeko duen eskubide kolektiboan oinarrituta Euskal Selekzioaren ofizialtasuna aldarrikatzen dugu.

.
3. Euskal Herria bere osotasunean ordezkatuko duen selekzioa nahi dugu, eta horretarako, Euskal Herriko Federazio Nazionalak behar ditugu.

.
4. Eta horretarako, guztion laguntza beharrezkoa da. Horregatik, gure aldetik saiatuko gara bidea jorratzen, ea guztion artean, egun ametsa besterik ez dena, ahalik eta azkarren, errealitate bihurtzen dugun.

.

Abenduaren 27an jokatuko den futbol partiduaren aurrean, Konpromisorik gabe, babesik ez!

.
GORA EUSKAL HERRIKO FEDERAZIO NAZIONALAK!

EHNA

Hamaika ekimen burutu dira EHNA Erabili Egunean

.

.

Egun, Euskal Herriaren aitortza inoiz baino ozenago entzuten da jendartean. Gero eta gehiago dira Euskal Herria aitortu eta EHNA (Euskal Herriko Nortasun Agiria) erabiltzen dutenak. Hala ere, badira euskaldun gisa bizitza arrunta eramatea oztopatzen duten enpresa, lokal, administrazio...

.

Honen harira, BAI Euskal Herrirari ekimenak hainbat deialdi zabaldu du abenduaren 23an burutzeko. Egun hau, EHNA Erabili Egun nazionala da.

.

Herri ezberdinetan ekimenak izan dira, besteak beste, Barakaldoko IKEAn, Pasaiako EuskoTrenen eta IF dendan, Tolosaldean, Bergaran, Donostiako EuskoTrenen eta FNACen...

.

Ehunka herritarrek "nazio bat garela" aldarrikatu eta EHNA eskuan ekimenak burutu dituzte. Gainera, herri ekimenaren kide baten esanetan "oraindik ere, euskal herritarren eskubideen ukazioa sistematikoa da". Antolatzaileek ekimenen inguruan adierazitako iritziaren arabera, "Euskal Herriak behar duen eskenatoki demokratikoak euskal herritarron naziotasuna aintzat hartu behar du".

Neguko Eguzki Jaia

Aldarrikapenez betea igaro da Bilboko Neguko Eguzki Jaia
.

Bilboko gazteek ozen irudikatu dute euren eskubideak salgai ez daudela. Hainbat eragile izan dira erasoen aurrean kalera irten eta gogor erantzun dutenak, besteak beste, Bilgune Feminista, Ikasle Abertzaleak, Segi, Kaskagorri gazte konpartsa eta Santutxuko Gazteon Kultur Elkartea.

.

Bilboko gazte mugimenduaren oharra:

.
Euskal Herriko Bilgune Feministak publizitatean emakumeok pairatzen ditugun erasoak salatu ditu; hainbat dira data hauetan emakumeon irudia desitxuratu eta objektu sexual bezala erabiltzen dutenak; honen aurrean Emakumeon duintasunaren kontra doalako, publizitate sexistarik ez!

.
Segik bestalde, Euskal Herriaren alde eta honek jasaten duen errepresio ororen kontra erantzun zuzena eman du Euskal Herri ekologista, feminista, sozialista, independentea... aldarrikatuz. Honengatik Segi borrokan, Segi antolakuntzan!

.
Ikasle Abertzaleakek, zatiketa administratiboak dakarren hizkuntz eskubideen urraketa, hau da, Euskal Herrian euskeraz ikasteko ezintasuna, salatu du. Tontxu Campos, Luis Campoy eta Gilles de Robien dira ikasleak euskaldunduak ez izatearen errudunak. Nahikoa da, Euskaraz ikasi eta bizi, ikasleoi iruzur gehiagorik ez!

.

Bestalde, Bilboko gazte kultur elkarteek ere, neguko eguzki jaian ohitura zaharren sustapena eta euskal kulturaren aldarrikapena kalera irtenda babestu dute. Baserritarrez jantzi eta kantu kantari goiz goizetik aritu dira bilboko kale ilunak euskal kulturaz argitu nahian.

.
Gazte ugari elkartu da Neguko Eguzki Jaiean ERNAIren (Santutxuko Gazteon Kultur Elkartea) gonbiteri jarraituz, goizean goiz Santutxuko 30 gazte inguru Herriko Tabernan bildu dira urteroko ohiturari jarraituz, baserritarrez jantzita eta giro alaian euskal musikarekin gosaltzeko asmoz. Txorizoa, arraultzak, urrak eta sagardoa dastatuta, triki-kalejira burutu dute auzotik. Pandero eta trikitixa soinuarekin Alde Zaharreraino heldu dira.

.
Bertan, KASKAGORRIk (Bilboko Gazte Mugimenduaren Konpartsa) antolatuta dozenaka gazte bildu dira. Eguneko giro apartak lagunduta poteo bat burutu dute bilboko Alde Zaharreko tabernetatik. Batzuk, kantari ere aritu dira euskal musika lagun. Ondoren, Solokoetxeko eskaileretan bazkari herrikoia prestatu dute. Euskal jakiak ez ziren falta izan.

Urteurrena

Herrira Plataforma, 10 urte presoen eskubideen defentsan eta aurrera!

.

.
Santutxuko Herrira Plataformak 10 urte daramatza euskal presoen eskubideen defentsan borrokan. Urtemugaren baitan, dokumentu berritua eta jasotako atxikimendu mordo aurkeztu dute burututako auzo asanblada batean.

.
Asanbladaren kronika:

.
Herrira Plataformak asanblada ireki bat burutu du Santutxuko Karmelo elizako lokaletan. Bertan, presoen eskubideen defentsan daramatzan 10 urteen balantzea egin zen. Ondoren gaur egungo egoerarekin batera, plataformak, dokumentu berritu bat aurkeztu zion auzoari. Asteetan zehar, honen gaineko atxikimendu bilketa bat egin izan da auzoko eragile, elkarte eta norbanakoekin ere. Azkenik eta Herriraren inguruko eztabaida batekin, antolatzaileek euskal preso eta iheslarien eskubideen alde bakoitzak lan egiten duen esparruaren arabera konpromezuak har ditzan eskatu dute. Gainera, datorren astelehenean, abenduak 25 burutuko den Herriraren manifestaziora joateko deia luzatu dute.

Mobilizazio eguna

Abenduaren 20a mobilizazio eguna izendatu du Ezker Abertzaleak

Hainbat eragileren babesarekin, Euskal Herriko Amnistiaren Aldeko Mugimenduak mobilizazio eguna deitu du abenduaren 20a; jendarte osoa "autodeterminazioaren alde, balditza demokratikoen alde" mobilizatzera gonbidatu du.

Prentsaurrekoan aipatu diren hainbat puntu:

•Zuen aurrean gaudenok, martxoaren 22tik gaur arte errepresio politikoak zuzenki kolpaturikoak gara. Kolpatua izan den herritar multzo oso zabal baten islatxo bat baino ez.

.
•Amnistiaren aldeko mugimenduak, azken zortzi hilabeteetan errepresio politikoa lehen eskutik jasan duten pertsona eta eragileekin batera, mobilizazio egun baterako deia luzatu nahi dio Euskal Herriari. Abenduaren 20an, Autodeterminazioaren alde, baldintza demokratikoak Euskal Herriarentzat lelopean burutuko dena hain zuzen.

.

•Dei hori egitera bultzatu gaitu, azken ia 9 hilabeteetako balantzea egiterakoan, argi gorri guztiak pizturik daudela uste dugulako. zergatik diogu hau? Euskal Herrian ilusioa eta itxaropena piztu zuten prozesu demokratikoa, erabat ezindurik eta jadanik hondoratua edo hondoratzear dagoelako.

.
•Prozesu demokratikoa eta errepresio politikoa, guztiz batera ezinak dira. Mila bider errepikatu dugu hau, baina estatuen esku -hartze politiko -errepresiboak, ez du etenik izan azken 9 hilabeteotan.

Gose greba

Elkartasuna Iñaki de Juanaren gose grebako 42. egunean

De Juanak 42 egun daramatza gose greba mugagabean; aurrekoan beste 63 egun egon zen baraualdian.

Joan den larunbatean, hilak 16, Bizkaiko Bertso Txapelketareki bat eginik, ehunka pertsona bildu ziren Euskalduna jauregiaren atarian Iñakiren askatasuna exijitzeko.

Halaber, Askatasunak adierazi duenez, Puerto IIko espetxean, Sebas Lasa eta Gorka Martinez euskal preso politikoak gose greba mugagabean daude, baita, joan den abenduaren 11tik. Iñaki de Juanaren kontrako heriotza ziogorra eta preso politikoen kontrako bizi arteko zigor inposizioa borrokatzea dira gose grebaren helburuak.

.

Gainera, Askatasunak iragarri duenez, abenduaren 20ean, asteazkenean, Ezker Abertzaleak deituta izango den mobilizazio egunean parte hartzeko deia luzatu dio euskal jendarte guztiari.

Bapatean bizkaia

Xabi Paia, Euskaldunan txapeldun
.

Zortzietatik gazteenak eraman du txapela azken urteetako Txapelketarik lehiatuenean. Etxahun Lekuek bigarren postuarekin konformatu behar izan zuen saio borobila burutu ostean.

Arratsaldeko 17:30tan hasi zen txapelketa. Zortzi finalistak oholtzara igo eta banan-banan hasi zuten agurrarekin saioa. 2000 lagun baino gehiagok jarraitu zuten zuzenean ikuskizuna eta dozenaka kidek, Euskaldunaren auditorio ondoan egokitutako beste gela baten jarraitu zuten.

.

Aurtengoa azken urteetako txapelketarik lehiatuena izan da, izan ere, puntu gutxigatik ez dira emaitza erabat aldatu.

.

Puntuaketa:

.

1. Xabier Paia 842,5
2. Etxahun Lekue 839,5
3. Iratxe Ibarra 498
4. Arkaitz Estiballes 487,5
5. Onintza Enbeita 487
6. Fredi Paia 486,5
7. Ibon Ajuria 476
8. Igor Muniategi 466

.

Iñaki de Juana gogoan

.

Saioak aldarrikapena ere izan zuen. Bertsolariak Iñaki de Juanaren askatasunaren aldeko kamiseta bana jantzita burutu zuten lana. Bertsotan ere behin baino gehiagotan aldarrikatu zuten euskal presoen etxeratzea edota iheslarien herriratzea. Dena den, bihotza taupaka irabazle gazteak jarri zuen "gose greban duen semeari"abeztu behar izan zionean.

.

Hona hemen Xabi Paiaren bertsorik sakonena:

.

Artikulu bat idatzi eban
barru barrutik kolpera
sentitzen eban hori azaldu
eban berbetan sobra
horrek ostera bere bizitza
ezin eroan hobera
ta epaileak agindu eban
berriz bota espetxera
gurago neban esan baleusta
horra semea etxera
Iñaki segi aurrera
ez egizu egin behera.
zeure barruan indarra dago
ta indar hori atera
zugaz batera hilko dalako
bake prozesua bera.

Euskara sarean

Sareko euskarazko produktuen katalogoa, abian

.

Bizkaiko 30 udaletako Euskara Zerbitzuk sustatuta, Sareko euskarazko produktuen katalogoa aurkeztu da Bilbon. Udako Euskal Unibertsitateak (UEU) osatu, Euskaltelek babestu eta Eusko Jaurlaritza, Bizkaiko Foru Aldundia eta Alkarbideren laguntzaz kaleratu den katalogo honen helburua 16 eta 26 urte bitarteko gazteei Interneten dauden euskarazko produktuak hurreratzea da.

Bilbon emandako prentsaurrekoan Gotzon Loberak, Bizkaiko Foru Aldundiko Euskara Sustatzeko Zuzendariak; Imanol Landak, Getxoko alkateordeak; Lore Erriondok, UEUko Zuzendariak eta Rafa Bañalesek, Euskalteleko ordezkariak hartu dute parte.

.

Azken hauen esanetan, katalogoak bi atal izango ditu:

-Lehenengoa, Sarean Blai da. Bertan, euskarazko softwarea, baliabideak, blogak euskaraz egiteko tresnak, denbora-pasarako jolasak, txateatzeko guneak, aldizkari elektronikoak eta beste hainbat guneri buruzko informazioa kaleratzen da.
-Bigarren atala, Ikusi eta Ikasi da eta hezkuntzarekin lotutako baliabideen informazioa bideratzen da. Besteak beste, apunteak, liburuak eta ariketak dituzten guneak, datu-baseak eta liburutegietako katalogoak.

Bapatean bizkaia

Bizkaiko bertso finala izango da gaur, Euskalduna jauregian

Bizkaiko Bertsolari Txapelketako finala gaur, abenduak 16, izango da Bilboko Euskalduna jauregiko areto nagusian. Finalaurrekoan dauden bertsolariak hauexek izan dira: Xabier Paya, Arkaitz Estiballes, Fredi Paia, Iratxe Ibarra, Etxahun Lekue eta Igor Muniategi.

2.200 sarrera jarri dira salgai eta inoiz baino lasterrago agortu dira, finalistak izendatu baino arinago, hain zuzen.
Eskaera handia izan da eta horri erantzun nahian, Bizkaiko Bertsozale Elkarteak Euskalduna Jauregiko areto txikiago batean finala proiektatuko du. Horrela, beste 613 pertsonek jarraitu ahal izango dute finala, Euskaldunan bertan, eta zuzenean.

Euskara

Manifestazioa izango da gaur Iruñean "Hizkuntza bat, lurralde bat, legedi bat, Ofizialtasuna!" lemapean
.

Autobus geltokitik abiatuko da 17.30tan Euskal Herrian Euskarazek euskararen normaltasunerako eta euskal lurralde guztietarako ofizialtasuna aldarrikatzeko manifestazioa.

Hainbat eragilek ere bat egin dute gure hizkuntzaren defentzaren aldeko manifestazioarekin, besteak beste EHBEk, IAk eta Segik. Hauen aburuz, euskarak bizi duen egoera "tamalgarria" PNV eramaten ari den "ley del vascuenceren" porrotoaren seinale besterik ez da. Gainera, eragileok adierazi dutenez, euskararen egoera "negargarria" bada oraindik orain, zer esanik ez hezkuntzaren arloan, "hau ez da salbuespena".

Beraz, hizkuntza baten alde, lurralde baten alde, legedi baten alde eta ofizialtasunaren alde, herritar guztiak Iruñeara joateko deia luzatzen du EHEk.

.

Ekimen Ibiltaria

Unibertsitateko ikasleek hartu diote lekukoa Ekimen Ibiltariari

.

Presoen Aldeko Taldeak (PAT) antolatuta, Ekimen Ibiltaria Araba, Bizkaia eta Gipuzkoako campusetara iritsi da. Euskal Herria zeharkatzen ari den herri mugimenduak bideratutako ekintza honek, helburu bakar bat dauka, Eskal Presoak euren eskubide guztien jabe etxeratzea.

.

Honetarako hiru oinarrizko eskubide exijitzen dituzte:

.

1. Gaixo larriak dauden presoen berehalako etxeratzea.

2. Kondena betea duten presoen berehalako etxeratzea.

3. Dagozkien eskubideen jabe euskal presoen berehalako herriratzea.

.

Gainera, gose grebalariek eskeinitako prentsaurrekoan, hiru baldintza demokratiko horiek exijitzeaz gain, Iñaki de Juanaren egoera ere salatu dute bere behin betiko askatasuna aldarrikatuz.

.

stxhnyarr2

200 bisitari izan ditu dagoeneko STXHNYARR2 blogak

.

Santutxu eta Hondarribitara bikotearen arte fusioa den stxhnyarr2 blogean 200 pertsona sartu dira jada. Gazteon arteko komunikazio tresna gisa erabiltzea helburu duen bloga abian da, aurpegi berrituarekin, orain arteko indar guztiak batuta, aurrera segitzeko prest.

.

Bolognari ez!

Hainbat fakultatetan Bologna "gelditzea" lortu dute ikasleek

.

Europar eraikuntzaren nahia abian da aspaldian. Existitzen ez den europar identitatearen eraikuntza indusketak martxan jarri dituzte azken urteetan. Existitzen ez den europar hizkuntza, usadio, kultura, historia komuna da eraiki nahi dutena. Soilik, mundu neoliberal eta kapitalista honetan konpetibititatearen lasterketan lehen lerroan kokatzeko, atzean ez geratzeko bide bakar gisa. Bologna Prozesua, eraikuntza horretan oinarrizko zutabe bilakatu da, Goi Mailako Hezkuntza berregituratzea eta eraikiko den Europa horreruntz pausuak ematea baita bere xedea.

.

Guzti honen kontra, ikasle mugimenduak Bologna Prozesua gelditzeko dinamika bat jarri du abian. Horren harira, Bilboko, Gazteizeko eta Ibaetako Magisteritzan, Leioako Gizarte eta Komunikazio Zientzien Falkultatean eta Ibaetako Kimika fakultatean Bologna, edo honen bitartekaria izango den Ikaskuntzarako Berrikuntza Plana (IBP), gelditzea lortu dute.

A-6 Intsumisioa!

Nazio bat garelako... jai egun arrotzei intsumisioa!

.

Hainbat eragilek Euskal Herria nazio gisa onartu eta abenduaren 6an, espainiar konstituzoaren egunean, inposaketen aurka mobilizatzeko deia luzatu dute. Gainera, denak eukal herritarrak garen legez, norberak bere esparruan, espainiar kontituzioaren egunean eta bestelako jai egun arrotzetan intsumisio jarrera tinkoa adieraztea eskatu dute.

.

Egunean zehar ikastetxe, fakultate, herri eta auzoetan Herri Eskolak izango dira Ikasle Abertzaleaken eskutik; honen xedea, nazio bat garen heinean herriak herriarentzako sortutako Euskal Eskola Nazionala irudikatzea.

.

LAB, sindikatu abertzalearen eskutik, mobilizazioak izango dira lantegietan; bestalde, arratsaldean, BAI Euskal Herriari ekimenak deituta manifestazioa izango da Durango 18.00tan "Nazio bat garelako euskal herritarron eskubideak errespetatu AUTODETERMINAZIOA" lemapean.

.

EHBEk ere euskal egutegi propio baten aldeko apostua aldarrikatu nahi du abenduaren 6an eta horretarako ekimenak antolatu ditu herri ugaritan. Bestalde, Segik, Gazte Erakunde Iraultzaileak, bat egiten du Euskal Herriko eragile ezberdinek antolatutako mobilizazioetan.

.

Adierazpenak:

.

Ikasle Abertzaleak

.

BAI Euskal Herriari ekimena

.

EHBE

.

Segi

AHTrik ez!

AHTren lanen hasiera salatzeko hainbat lagun kateatu egin dira

.

Urbina eta Luku bitartean eraikitzen ari diren AHTko zatiaren lanak oztopatu nahian 20 lagun kateatu egin dira. Hamar kideko bi taldetan banatu dira eta Ertzantza gerturatu egin zaie.

.

Ekintzaren kronika:

.

14:00tan hasi da ekintza AHT EZ gunearen eskutik. Lagunak kateatu eta lurrera eseri dira. Bertako langileak aurrera jarraitu ezin zutela ikusirik Ertzaintzari deitu diote. Bitartean komunikabideak heltzen joan dira eta kideen ohiuak entzun ahal izan dituzte: "AHTrik ez!", "Txikiziorik ez".

.

Bi ordu geroago, 14:00ak aldera, Ertzaintza agertu da; hauek, pertsona guztiak miatu eta hormaren kontra jarri dituzte. Ondoren mendian gora joan dira "norbait" aukituko esperantzaz.

Ahotsak

.

Dokumentu berritua aurkeztuko du AHOTSAKek larunbatean, Euskaldunan

.

Datorren larunbatean, hilak 2, gatazkaren konponbidean emakumeon hitza, partehartzea eta erabakiak hartzeko sortutako Ahotsak plataformak dokumentu berrituaren aurkezpena burutuko du.

.

Bertara, Euskal Herriko atxikimendu berrituak eta baita Euskal Herritik kanpokoak ere aipatuko dituzte. Plataformako kideen esanetan "oso aberazgarria izan da" bertoko zein kanpoko emakume ezberdinen laguntza eta esperientzia gurearekin batera izatea.

.

Guzti honek "emakumeon erabaki guneetan parte hartzea ezinbesteko dela" aldarrikatzea du helburu; horretarako, 2004an bakearen Nobel Saria jaso zuen Wangari Maathai emakume afrikarraren ekimen bat izango dute ikusgai.

Hauteskundeak UPVn

Ikasle Abertzaleak izan da garaile UPVko hauteskundeetan

.

Pasadan astean izan ziren UPVko hauteskundeak. Bertan Araba, Gipuzkoa eta Bizkaiko ikasleek euren ordezkariak hautatzeko aukera izan zuten. Bozkak erabatekoak izan ziren erakunde abertzalearen alde; gainera, hamaika izan ziren EHNA eskuan bozka eman zutenak.

.

Berriro ere, aurreko urteetan emaitzetan islatuz joan den bezala, Ikasle Abertzaleak izan da garaile ikasleriaren bozken gehiengoa lortuz, gainera, klaustroan erabateko nagusitasuna lortu du.

.

Erakundea posik agertu da emaitzekin, izan ere, "IA sendotuz doala esan dezakegu eta ikasleriaren artean erreferentzia bilakatu dela".

.

Dena den, ordezkarien esanetan, "azpimarratu nahi dugu hauteskunde hauetara aurkeztu arren ez dugula berorien eta UPV-EHUko organu erabakitzaileen zilegitasuna onartzen", gainera, instituzio "antidemokratikotzat" jo dute.

.

Hala ere euskal ikasleen eskubideen defentzan "borrokatzen" jarraituko dutela berretsi dute, baita Bologna Prozesuaren "aurka" ere.

Durangoko Azoka '06

Durangoko Azoka, gazte sormenari irekitako ateak

.

Aurten ere, azken urteetan egin izan den bezala, gazte sormenak lekua izango du Durangoko Azokan GazteSarea eta Xirikaren eskutik. Durangoko Azoka euskal kulturaren erakus-lehio garrantzitsua izan ohi da, horren baitan, ezin falta gazteek, gazteontzat egindako lanak. GazteSarea eta Xirika gazte sormenaren sustatzaile eta laguntzaileak dira, horregatik, aurten ere, leku bat izango dute azokan Euskal Herriko gazte sormenaren islada legez.

.

Gazteriaren Biltzarra '06

"Aurtengoan Gazteriaren Kontseiluaren ekinbidea zehaztu dugu"

Euskal Herriko Gazteriaren Kontzeiluaren eskutik Gazteriaren Biltzarra '06 burutu da Andoainen "gazteok erabaki, gazteok eraiki" lemapean. Dozenaka izan ziren goiz goizetik Bastero Kulturgunera hurbildutako gazteak, helburu bezala, "kolektibo bat garen heinean, gure eskubideak errespeta daitezen indarrak bateratu behar ditugu".

.

.

Egunean zehar biltzarrean jorratu dituzten puntuak etxebizitza, gazte espazioak, laborantza, euskara, emakume gazteen aurkako indarkeria baztertzeko manifestua... izan dira. Gaiok, "gazteok proposatu, eztabaidatu eta onartu ditugu", izan ere, Euskal Herrian bada "guretzako" lemarik: "gazteok erabaki, gazteok eraiki".

Ikasleon Nazioarteko Eguna

Milaka izan dira euren eskubideen alde kalera irten diren ikasleak

.
Azaroaren 17a, ikasleon nazioarteko eguna da, eta horren harira hainbat ikasle, bai ikastetxe eta bai unibertsitateetakoak kalera irten ziren haien eskubideak defendatzeko. Bilbon, Iruñan, Gasteizen, Arrasaten, Donostian eta Baionan egon ziren manifestazioak Ikasle Abertzaleakek deituta. "Bolognari ez", "Gure eskubideak ez daude salgai" eta hainbat lelo gehiago entzun ziren manifestazioetan. Bilboko manifestazioak Hezkuntza Delegaritza aurrean egin zuen etenalditxo bat, eta bertan parodia bat burutu zuten egungo egoera tamalgarriaren adierazle, non pertsona trajedun batzuk eskubideak saltzen hasten ziren, eta ikasleek bertatik botatzen zituzten. Honekin, Hezkuntza Delegaritza markatu nahi izan zuten eskubideen salerosketan parteartzaile zuzena.

. .
Azaroak 17, ikasleon nazioarteko eguna bada ere, pozteko eguna ez dela adierazi zuten antolatzaileek. "Gure eskubideak bermatuak ez zaizkigun momentutik ezin dugu pozik egon, eta egun hau baliatu behar dugu gure haserrea erakusteko, eskubide urratzaileek aurrean izango gaituzte. Kanpairik entzun nahi ez duenak, ez dezala sokatik tira!" zioen ikasle mugimenduko kide batek. Ekitaldian, aurrera begira lanean jarraitzeko deialdia egin zen ikasleriari, "denok elkartuta lortuko dugu urratuak zaizkigun eskubideak lortzea!".

Bolognari ez!

Bologna Prozesuaren kontra azaldu dira Leioako kanpuseko ikasleak

.

Ikasleon Nazioarteko Eguna (azaroak 17) heltzear dagoela, hainbat ekimen burutzen ari dira Euskal Herrian barrena ikasleon eskubideen alde. Oraingoan, Leioako Ikasle Abertzaleak Bolognaren kontra agertu da.

.

. .

Autobus geltokia jendez gainezka zegoela, hainbat ikaslek "Bolognari Ez! Azaroak 17, ikasleok kalera!" lema zeraman pankarta bat erakutsi eta autobusak geldi arazi dituzte. Bitartean, beste 3 kide autobus baten gainera igo eta beste pankarta bat atera dute. Dozenaka izan dira ekintza jarraitu duten pertsonak. Gainera, "Bolognari Ez!" mezua argi eta garbi azalarazteaz gain, ikaslearia osoa antolatutako mobilizazioetan parte hartzera gonbidatu dute; hurrengoa: itxialdia. Datorren ostegunean 19:00tatik aurrera kanpuseko kafetegi nagusian.

.

Euskal Herriak autodeterminazioa!

Milaka euskaltzale izan dira bilboko kaleetan autodeterminazioaren alde

Ohikoa den atzerapenarekin hasi zen Bilboko Aita Donostiatik autodeterminazioaren aldeko manifestazioa. Milaka lagun gerturatu ziren Euskal Herriko txoko guztietatik lelo argi bati jarraiki: Euskal Herriak autodeterminazioa.

.

.
Gainera, duela 6 egun gose greba mugagabea berriro era hasi zuen Iñaki de Juanaren aldeko aldarria ez zen falta izan zitan. Ertzaintzak ere bere delegaritza bidali zuen kaleetara, dena den, hauek, jendearen txistu eta oihu artean egin zuten ibilia.
Manifestazioak Bilboko udaletxean izan zuen amaiera eta ekitaldian Arnaldo Otegi, Batasunako eleduna, igo zen oholtzara.
Honen hitzetan, prozesua “krisian” dago eta Ezker Abertzaleak gatazka gainditzeko lanean sutsu jarraitzen duela eta horrek "fruituak" ekarriko dituen esperantza badagoela gaineratu zuen.
Gainera, mahaikidearena buruz, “gatazkari behin betiko amaiera emateko, anbizio historikoz eta ausardia politikoz jokatu behar da”.
Otegik, halaber, bestelako alderdiei mezu zehatz bat ere bidali zien: “beldurrak alboratu eta ausartu zaitezte alderdien mahaian Ezker Abertzalearekin hitz egiten”.

Jarrai - Haika - Segi

"Independentziaren bidean, Segi borrokatzen, Segi antolatzen"

.

Euskal Herriko 400 gazte inguru bildu ziren atzo PSOEren bilboko egoitzaren aurrean hilaren 16tik aurrera Espainiako Auzitegi Gorenak gazte erakundearen aurkako azken ebazpena kaleratuko duela eta, gazteriaren eta Euskal Herriaren aurkako erasoaldi berri hau salatzeko. Aurretik manifestazioa burutu zuen Segik Gugemheim museotik normaltasun osoz, dena den, PSOEren egoitza aurrera gerturatzean Ertzaintzak bortizki erasotu zituen bertara gerturatutako gazteak, ekimena debekatu, jipoitu eta gazte bat atxilotuz.

.

Hala ere, debekuak debeku, gazte erakundeak bigarren deialdi bat egin zuen plaza Zirkularretik Alde Zaharreraino manifestazio berri bat burutuz. Gainera, 5 minutuko bide mozketa ere egin zuten gazteek. Bertan bi gazte atxilotu zituzten; bat aske utzi eta bestea, lekukoen adierazpenei jarraiki udaltzaingoak atxilotu, lurrera bota, jipoitu eta pistola atera dio.

.

.SEGI, Gazte Erakunde Iraultzailearen

adierazpenak gertatutakoaren harira:

18 / 98 +

Eskubide zibil eta politikoen defentzan Fermin Muguruzak kontzertua eskainiko du azaroaren 11n, BECen

.

18/98+ makroepaiketaren harira hainbat ekimen eta mobilizazio antolatu dira azken hileotan; esaterako, herriz herriko lantaldeen eskutik ekimenak, 19/89+ Plataformak antolatutako Bat Egin Eguna...

.

Oraingo honetan kontzertu erraldoi bati egokitu zaio txanda. Eskubide zibil eta politikoen defentzan Fermin Muguruza izango da BECen (Barakaldo). Gainera, honen azken lanaren aurkezpena izango da larunbatean, izan ere, "Fermin Muguruza Euskal Herria Jamaika Clash" Euskal Herrian ikusteko aukera bakarra izango da seguru asko.

.

.

Ekimen honetara hamaika izan dira atxikitu diren eragile sozial, sindikal, politiko eta norbanakoak, besteak beste: Kirmen Uribe, Itziar Ituño, Tiko, Segi, Ikasle Abertzaleak, EGI, Gazte Abertzaleak, Ezker Batua Gazteak, Aralar Gazteak, Euskadiko Gazteriaren Kontseilua, Amets Arzallus, Maialen Lujanbio, Unai Iturriaga, Oreka TX, Pirritx eta Porrotx...

.

Honen inguruko informazio osagarria:

http://www.18-98plus.org/makrokontzertua

Alardea

Alarde mistoa babesteko inolako asmorik ez dutela adierazi dute Irungo eta Hondarribiko alkateek

.

Hondarribiko eta Irungo alkateek (Gipuzkoa) muzin egin diote berriro ere emakumeen berdintasun eskubidea aldarrikatzen duten alarde mistoak babesteari. Gauzak dauden bezala ondo daudela esan du Irungo alkate Jose Antonio Santanok (PSE-EE), eta herritar gehienen iritziaren kontra ezin duela egin azaldu du Hondarribiko alkate Borja Jauregik (EAJ).

Ezker Abertzalea (EAB) taldearen eskaerari jarraituta Eusko Legebiltzarraren Emakume eta Gazteria Batzordean agerraldia egin zuten atzo goizean.

Orain arte erakutsitako jarrerari eutsi zioten alkateek, EAJren alkatearen irudiko, Hondarribiko alardean jasotako gertakariak larriak badira ere, ez dute emakumeen diskriminazioarekin zerikusirik. «Gatazka soziala da, oso larria, eta azken hamar urteotan gatazka gaiztotu egin da. Alkatea naizen aldetik errespetua eta berdintasuna aldarrikatu ditut behin eta berriro», esan zuen Jauregik. Ildo horretan, alardea pribatizatzeko erabakiak «bake soziala» bermatzeko helburua izan zuela azpimarratu zuen. Alkateen adierazpenak:

«Hondarribiko Udalak ezin du alarde mistoa antolatu, herritar gehienek ez baitute nahi»

Borja Jauregi (Hondarribiko alkatea)

«Arazoak bideratzen ari dira, eta herritar orok du bere eskubideak gauzatzeko aukera»

Jose Antonio Santano (Irungo alkatea)

Informazio gehiago:
Berria
Gara

Ikasle Eguna '06

Azaroak 4, aurtengo Ikasle Eguna Fikoban (Irun)

Ekintzaz beterikoa da aurtengo Ikasle Eguna. Arratsaldeko 4retatik aurrera eta goizaldera bitartean, jaia eta aldarrikapena izango dira nagusi azaroaren 4ean Fikoba erakustazokan, Irunen.
Jaialdiaz gain, Ikasle Abertzaleak-ek MusikHerriarekin batera, "Urtez urte sokak apurtuz" lemapean, musika bilduma bat argitaratu dute; besteak beste, Amaiur taldeak eginiko aurtengo Ikasle Egunerako kanta azaltzen da bertan.

Hona emen Ikasle Eguna '06ko egitaraua:
16.00 --> Harrera ekitaldia
16.30 --> Kaleanimazioa
20.00 --> Ekitaldia, eta ondoren kontzertuak:
- Amaiur - Kauta - Doctor Deseo
- SKT sekuentzia - Betagarri
- Soziedad Alkoholika - Berri Txarrak

Sarreren salmenta lekuentzako, autobusetan apuntatzeko, Ikasle Eguneko kantua jeisteko...

www.gaztesarea.net/bereziak/ikasleeguna06/

www.ikasleabertzaleak.net

Nazio Eztabaida '06

Nazio Eztabaida '06 eman da asteburuan, Burlatan

Asteburu hontan, Burlatara hurbildu zen jende anitz Euskal Herriko garapenerako eta etorkizunerako onuragarriak izango diren pausuak adosteko. Bertatik ateratako puntu azpimarragarrienak Udalbiltzaren berrantolaketaren beharra, Aberri Eguna era bateratuan burutzeko ideia, Euskal Herriak interneten .eus domeinu propioaren proposamena eta Zuberoaren biziraupenerako eta bidea zabaltzeko konpromisoak izan ziren.
Hauek ala ere ez dira adostatuko puntu bakarrak.

Asteburuaren kronika zabalagoa jaso nahi izanez gero:
www.gaztesarea.net/bereziak/eh06/?p=21#more-21

Euskal Herriak autodeterminazioa!

Euskal Herriak autodeterminazioa!

Ehunka euskaltzale hurbildu dira Europar Parlamentura prozesuari bultzada eman asmoz

8 izan dira orotara Oiartzundik abiatutako autobusak, indar polizialen trabak gainditu eta bidai luzeari ekin diotenak. 400 kide baino gehiago izan dira euren herrialdetik Estrasburgora abiatu direnak. Helburua argia, Euskal Herriaren aitortza. Euskal Herritik bertara gerturatu eta Joseba Alvarezek, Batasunako mahaikideak, gidatutako ekitaldia burutu da bertan.

Hau guztia Euskal Herriak autodeterminazioa! kanpainaren harira antolatua izan da ezker abertzaletik, izan ere, Europar Parlamentuan euskal gatazka eztabaidatu da eta «euskal herritarren presentzia nahitaezkoa izan da».
Parlamentu barruan hainbat euskal ordezkaritza sozial, sindikal eta politiko egon da; aipatzea dago, gainera, Batasunari sarrera ukatu egin zaiola, dena den, kanpoaldean burutu da ekitaldia. Bitartean, parlamentuan, eztabaida eta bozkatzeari eman zaio txanda. Azkenik, 10 bat bozkako aldearekin, prozesuari onespena eman zaio eta Europar Batasunaren babesa izango du. Dena den, Alvarezen hitzetan, Euskal Herrian dago gakoa, lurraldetasunean eta autodeterminazioan. Honengatik «borrokatzen jarraitu beharko dugu».

Alde Hemendik!

Guardia Zibil espainolak eta Ertzaintzak Euskal Herriko hainbat herriko taberna miatu dituzte

Gaurko egun osoan zehar Euskal Herriko auzo eta herri ezberdinetako 17 Herriko Taberna okupatu ditu Guardi Zibilak. Auzitegi Nazionalaren aginduari jarraiki, lokaletan sartu eta Herri Batasuna, Euskal Herritarrok eta Batasuna legez kanpo utzitako alderdien ondasunen "inbentarioa egitea" izan da xedea.
Nafarroan, Iruñako Arrotxapea eta Txantrea auzoetako, Tudelako, Leitzako, Atarrabiako, Burlatako, Altsasuko eta Tafallako egoitzak itxi dituzte miaketa egiteko. Arrotxapeako herriko tabernaren aurrean 40 bat lagun bildu dira, protesta egiteko.
Araban, Gasteizekoan eta Aguraingoan sartu dira indar polizialak. Ertzaintza, bestalde, Labastidan dagoen herriko tabernan sartu da.
Gipuzkoari dagokionean, hiriburukoan bakarrik izan dira poliziak. Hala, Alde Zaharreko herrikoan eta "Marruma" elkartearen egoitzan sartu dira. Zarautzen ere miaketak egin ditu Guardia Zibilak.
Bizkaiari so eginez, Portugaleten, Durangon eta Santutxun izan dira Espainiako indar polizialak. Santutxuko herriko tabernara sartu direnean, langile eta bezero bat besterik ez zegoen barrualdean; hauek, hormaren kontra jarri eta identifikatu dituzte. Bezeroa lokaletik irteten utzi arren, langilea barruan egotera behartu dute. Kanpoaldean 50 bat lagunek kontzentrazioa egin dute “Euskal Herria aitortu, errespetatu. Alde hemendik!” lemapetan; ondoren, “Alde hemendik, utzi bakean. Hau al da zuen bakea?” oihuekin batera, manifestazioa burutu dute.

«Onartezina da herriko tabernen miaketa»

Tazio Erkiziak Santutxun eginiko adierazpenen harira, Guardia Zibilaren jokaera Euskal Herriaren kontrako “eraso zuzena” da. Herri Batasunaren mahaikide ohiaren aburuz, “eraso hauek badute erantzule politikorik: PSOEko Patxi Lopez-etik hasita Zapateroraino”.
Erkiziak azaldu duen legez, indar polizialen “probokazio hau ezker abertzalearen kontrako erasoen dinamikaren barruko beste pauso onartezin bat besterik ez da”.

Adierazpenen iturria:

http://www.gara.net/azkenak/orriak/10/art185743.php

Oinarrizko Hezkuntza Akordioa

Hezkuntza sistema propioaren alde bat egin dute hainbat eragilek Oinarrizko Hezkuntza Akordioan

Miramar Jauregian izan dira Hezkuntza sistema nazional baten aldeko akordioa sinatu duten hainbat eragile. Funtzean, euskal ikasle orok dituen oinarrizko eskubideak defendatzea du helburu. Honen harira, Nazio Garapenerako Biltzarraren dinamikari jarraituz, lehenengo Hezkuntza Foroa antolatuko dute datorren udaberrirako.
Euskal Herriko Oinarrizko Hezkuntza Akordioaren sustatzaileek, besteak beste, Euskal Herriko hezkuntza publikoaren kontzeptua eta euskal herritarren hezkuntza eskubideak definitzea dute helburu.

EUSKAL HERRITARREN HEZKUNTZA ESKUBIDEAK:

1-. Euskal Herrian bizi den herritar orok, hots, euskal herritar guztiek, nazioarteko oinarrizko eskubideen hitzarmenetan jasotako eskubideetan oinarrituta, Euskal Herrian bertan edozein ikas- mailatan edota ikasarlotan ikasteko eskubidea dute, eta ez da inor baztertuko arrazoi politiko, ekonomiko, sozial, jatorriarekin edo sexuarekin lotutako, ideologiko edo akademikoren bat tarteko edota urritasun fisiko edo psikikoren bat izateagatik.
2-. Euskal herritar orok eskolaren bidez euskalduntzeko eskubidea du. Euskal Herri osoan, edozein hezkuntza eskaintzatan euskaraz ikasteko eskubidea du. Eta hezkuntza prozesu osoan, ikasgune guztietan, euskaraz bizitzeko eskubidea du.
3-. Euskal herritar orok Euskal Herriko curriculum propioaren arabera hezteko eskubidea du, eta bertako nahiz munduko jendarte zein kultur adierazpenak kontuan hartuko dira.
4-. Euskal herritar orok hezkidetzan oinarritutako hezkuntza jasotzeko eskubidea du; hots, parekidetasuna lortzeko didaktikan oinarrituriko hezkuntza jasotzeko eskubidea.
5-. Euskal herritar orok hezkuntza oinarri demokratikoen arabera antolatzeko eta kudeatzeko eskubidea du: eskubide demokratiko guztiak (adieraztekoa, biltzekoa...) bermatuz, eskola komunitatearen aniztasuna kontuan hartuz, parte hartzean oinarritutako antolaketa zein kudeaketa demokratikoa gauzatuz, eta eskola komunitatea osatzen duten per- tsonen eta herritarren hezkuntzaren gaineko erabakiak hartzeko eskubidea bermatuz.
6-. Euskal herritar orok eskubidea du euskara eta jakintza ardatz izango dituen Euskal Unibertsitate Sistema izateko, Euskal Herriaren beharrak aseko eta bideratuko dituena.
7-. Euskal herritar orok eskubidea du hezkuntzaren bidez bere ahalmen guztiak garatzeko, pertsona kritiko eta aske izateko bidean.
8-. Euskal Herriko ikasguneetako etorkin berriei eskubide osoz euren ama hizkuntza eta kultura errespetatuko zaizkie.
9-. Hezigune bakoitzeko hezkuntza komunitateak bere Hezkuntza Proiektua izateko eta kalitatez garatzeko eskubidea du.
10-. Hau guztia posible izan dadin, euskal herritarrek hezkuntzari buruzko erabakiak hartzeko eskubidea dute. Hau da, Europako hezkuntza esparruan, Euskal Herriak hezkuntza sistema propioa izateko eta arautzeko eskubidea du.

Euskal herritar orok dituen eskubideak izanik, hezkuntza sistemak guztientzat izango direla bermatu behar du. Bide horretan, «hezkuntza zerbitzu publiko» horiek ahalbidetzen direla zaindu behar du.

Konponbidea

KONPONBIDErako mahaia orain!

Ikasleria epaitua

EHUko 103 ikasle epaituko dituzte 2003an Leioan itxialdia egiteagatik

Bihar epaituko dituzte, Getxon (Bizkaia), 2003an Euskal Herriko Unibertsitateko Leioako campusean atxilotu zituzten 103 ikasleak.
Espainiako Unibertsitateen Lege Organikoaren kontrako itxialdia egiten ari ziren. Hilaren 17ko epaiketaren harira, lege horren kontrako eta Bolognako prozesuaren aurkako beren jarrera berretsi dute Ikasle Abertzaleek, eta eginen dituzten mobilizazioetan parte hartzeko eskatu diete ikasleei.
2003ko itxialdian Unibertsitateen Lege Organikoa bertan behera uzteko eskatu zuten Leioako ikasleek, IAk gogoratu duenez, eta asmo horri eusten diotela argi utzi dute. «Europako goi mailako hezkuntza esparrua arautu nahi digute orain; Unibertsitateen Lege Organikoak mamu handiago baten neurriak malgutu besterik ez du egiten».

BOLOGNA PROZESUA TARTEAN

Unibertsitateen legea Bolognako prozesuaren bide laguna dela nabarmendu dute Ikasle Abertzaleek, eta haren egitekoa dela prozesu horrek ekarriko dituen ondorioak apurka barneratzea. Ondorio horiek asko eta oso txarrak dira IAkoen hitzetan: «Hezkuntzaren homogenizazioa dakar Bolognak, hezkuntzaren pribatizazioa. Unibertsitatea multinazionalen eta elite indartsuenen eskuetan uztea du helburu».
Euskal Herriaren gisako herri txikietan ondorio horiek are kaltegarriagoak izanen direla azaldu du IAk, tartean euskara unibertsitatetik desagertzea eta euskal edukiak baztertzea.
Bolognako prozesua inposatu nahi dutela gaineratu dute ikasleek, eta haren kontrako ahotsak isilarazi nahi dituztela. Horren adibidetzat jo dute 2003. urteko itxialdian 103 ikasle atxilotu izana, eta orain haien kontra epaiketa egitea.
Ikasleen aurkako neurrien erantzule bada Euskal Herriko Unibertsitatea ere, IAren aburuz, eta, hori dela eta, erakunde horretako agintariek ikasleen aurkako prozesuan bete duten rola gaitzetsi dute. «Inposatzaileen lagun izan da EHU; borreroen gisa jokatzen du arrotz dituen dekretuak eta prozesuak onartzen eta martxan jartzen dituenean, Unibertsitateen Lege Organikoaren eta Bolognako prozesuaren kasuetan bezala», esan dute IAko kideek.
Biharko, epaiketaren atarian, hainbat mobilizazio prestatuko dituztela aurreratu dute ikasleek, eta haietan parte hartzera deitu dute jendartea.

http://www.gaztesarea.net/info/berria.php?id=6518

Euskal Curriculuma

EUSKAL CURRICULUMak herritarren ekarpenak jasoko ditu larunbatean Kursaalean

Datorren larunbatean, hilak 28, “Euskal Curriculuma. Herritarren Ekarpenak.” deituriko jardunaldia burutuko du Udalbiltzak Kurtsaalean.
Hausnarketa prozesu honek hiru fase izan ditu, ikasturteko urtaro bakoitzeko bana. Lehenengoa udaberrian hasi zen: dinamizatzaileak Euskal Herri osoko 320 herri eragilerekin jarri ziren harremanetan egitasmoaren berri emateko. Ondoren, udazkenean, ekarpenak jasotzeko momentua iritsi zen. Bai herri eragileetan eta baita web gunearen bitartez jasotakoa ekarpenak bildu eta landu egin ditu talde dinamizatzaileak. Orain, negua gainean daukagula, ekitaldi publiko bat burutuko da.
Bertan herritar orok egin ahal izango du bere ekarpena. Gainera, lan hori errazteko, Udalbiltzak hainbat lantalde sortu ditu, besteak beste: hezkuntza eta sistema pedagogiko berriak, hezkuntza eta hezkidetza, hezkuntza eta komunikabideak…
Honekin, guztiarekin, Udalbiltzak herritarren ekarpenak jasoko ditu. Dena den, Curriculumaren osaketan beste bi urrats dira funtzezko: Euskal Herriko Ikastolen Konfederazioak eta Sortzen-Ikasbatuaz Elkarteak burutu behar dutena hain zuzen ere. Hauen lana eskola-sarean Euskal Curriculumaren inguruan ahalik eta eztabaida zabalena eman dadin bideak jartzea da.Beraz, Udalbiltzak, Euskal Herriko Ikastolen Konfederazioak eta Sortzen-Ikasbatuaz Elkarteak burutuko duten lanarekin Euskal Curriculuma prest egongo da hilabete gutxiren buruan.

CURRICULUM EUSKALDUNA, CURRICULUM EUSKALTZALEA

Zeintzuk dira, derrigorrezko hezkuntza baten, Euskal Herriko ikastetxe batean ikasten ari den 16 urteko gazteak gutxienez ezagutu behar dituen kontzeptuak, lortu behar dituen trebetasunak eta berenganatu behar dituen baloreak?
Galdera hori erantzuteaz arduratuko da Euskal Curriculuma, izan ere, Euskal Herri osoko hezkuntza sisteman aplikatuko da. Honek, hezkuntza euskalduna, partehartzailea, hezkidetzailea, euskaltzalea… bideratuko du.
Honekin, guztiarekin, batez ere, Euskal Herriko hezkuntza sistema nazional bat sortu nahi da non hezituko diren belaunaldi berriak hezkuntza euskaldun eta euskaltzalea jasoko duten; horrela, Euskal Herri berri bati bidea eginez.

http://www.udalbiltza.net/euskalcurriculuma/